第七場
時：日
地：茶樓
人：秋、凡、光、鬼
凡：你咁嘅樣去拍戲？好難發圍架喎。
光：哎，凡哥，後生仔發吓明星夢好正常啫，過幾年都上唔到位就會明架喇。
• 秋見二人當面這樣說他，愣住。
鬼：喂世侄，你做演員，啫係藝員訓練班啦，你咪成日見到明星？啲姐仔真人定上鏡靚呀？
秋：差唔多啦都係咁啦。
• 秋邊說邊慢慢把鑰匙轉近自己，臨拿起鑰匙時旁邊的光卻多轉了半圈夾食物。
鬼：咁呢排同緊咩明星拍戲呀？
秋：近排同緊修哥拍呀。
光：咦？胡楓呀？胡楓好，佢同蕭芳芳跳舞好睇架！
秋：其實唔係嗰個修哥……
鬼：（無視秋，同意光）咪臭係。以前啲戲好睇幾多呀，而家啲戲都唔知噏乜嘅！有特技有飛機大炮就叫好睇呀？啲演員口擘擘識講對白就叫做戲喎！係咪咁話呀！
光：係呀！而家啲人唔識拍戲架喇！
• 秋見他們想當年當得興起，又悄悄轉鑰匙過來，想拿的時候老友記的目光又放回他身上。
鬼：世侄，而家做戲呀，唯一出路就係返大陸！不過唔好亂講嘢！搵食緊要呀，知嗎？
秋：知架喇知架喇。
• 然後鑰匙又被要夾菜的凡轉走了。
光：近幾年有冇港產片好睇呀？
秋：（興致）有喎！有套戲就上架喇，叫做《一臉茫然》呀，冇特技冇飛機大炮架。個演員都好好睇架。
光：係咩？邊個做架？
秋：我囉！
光：係呀……哦……
鬼：都話香港冇戲好睇架啦。
凡：算吧啦，香港拍戲又好拍劇又好，收皮架喇，唔好話鬼佬吖，大陸都勁過你多多聲啦，製作又幾億，票房又幾億，掟都掟死你呀。秋仔，做演員，好講天份架，如果冇天份，趁後生搵啲正經嘢做啦。
#仇老爺爺 第二集 《洗塵》
Search